O BNG reclama no Pleno de Abegondo que a Xunta recupere o CIAM de Mabegondo
O grupo municipal do BNG de Abegondo levou ao Pleno unha moción para que a corporación inste á Xunta de Galicia a garantir a recuperación do Centro de Investigacións Agrarias de Mabegondo (CIAM), unha iniciativa que finalmente non contou co apoio do goberno local do PP.
O portavoz nacionalista, Blan García Roel, lembrou que o CIAM é un centro histórico da investigación agraria en Galiza, cunha orixe que se remonta ao século XIX e asentado en Mabegondo desde os anos 70, con máis de 300 hectáreas de finca experimental, laboratorios e instalacións gandeiras ao servizo do sector agrogandeiro galego.
García Roel denunciou no Pleno o que cualificou como un proceso de desmantelamento progresivo por parte da Xunta e da Axencia Galega da Calidade Alimentaria (AGACAL), responsábel do centro, con anos de recortes, falta de investimentos e perda de persoal investigador. Un diagnóstico que lle vén dando a razón ás denuncias do propio cadro de persoal, que xa en febreiro advertira nun escrito dun 'desmantelamento progresivo' e da falta de cobertura de prazas imprescindíbeis para manter as liñas de investigación.
O voceiro do BNG lembrou ademais que na última semana de outubro abandonaron o CIAM sete investigadores, seis deles a través dun concurso de traslados que o propio persoal definiu como 'voluntariamente forzoso', o que deixou o centro nunha situación crítica e con varias liñas de traballo en risco. A isto súmanse as recentes actuacións da Inspección de Traballo, que vén de requirir a AGACAL medidas urxentes en materia de prevención de riscos laborais nas instalacións de Mabegondo.
Fronte a este panorama, a moción do BNG propón que o Pleno solicite á Xunta a reposición íntegra do persoal investigador e técnico perdido nos últimos anos, a modernización e mellora das infraestruturas, equipos e maquinarias, así como a garantía dun orzamento suficiente e dunha xestión transparente e participativa que permita reorientar o centro ao servizo das necesidades reais do sector agrario galego.
Desde o BNG lamentan que o goberno municipal do PP votase en contra da iniciativa. García Roel afeoulle ao alcalde, José Antonio Santiso, que 'di defender sempre o mellor para o concello, pero á hora da verdade anteponse á disciplina do PP na Xunta, mesmo cando se está a desmantelar un centro de referencia asentado en Abegondo e destruíndo os postos de traballo vinculados a el'.
Os nacionalistas tamén levaron ao Pleno outras dúas propostas: unha para promover a catalogación, protección e conservación do patrimonio ligado á auga (fontes, lavadoiros, muíños ou pontes) e outra, vencellada ao 25N, para aumentar os recursos municipais destinados á loita contra a violencia machista. Ningunha delas contou tampouco co apoio do PP. O BNG acusa o executivo local de manterse nun 'sectarismo' e nunha 'falta total de diálogo' que, ao seu xuízo, leva o goberno a votar en contra de iniciativas que consideran positivas e demandadas pola veciñanza unicamente por seren impulsadas pola formación nacionalista.