O BNG reclama á Xunta que recupere a praza de coidadora eliminada no CEIP Concepción Arenal
A eliminación de recursos no CEIP Concepción Arenal continúa a xerar preocupación entre a comunidade educativa. O pasado 28 de novembro, a Xunta decidiu suprimir unha das dúas prazas de coidadora do centro, o que, segundo o BNG, repercute directamente na calidade da atención aos alumnos que máis o precisan.
Mercedes Queixas, deputada do BNG, presentou unha proposición non de lei para que a Xunta restitúa con urxencia este posto e así garantir a adecuada atención educativa de todo o alumnado. A deputada denuncia que esta redución supón unha diminución importante na calidade asistencial e educativa para os nenos e nenas máis necesitados, un recorte que a sociedade non debería aceptar.
Ademais, en relación co profesorado especializado para o alumnado con necesidades educativas especiais, a Xunta só cubriu unha praza de PT a tempo parcial, insuficiente para atender a demanda real do centro.
Queixas critica que, a pesares de coñecer a situación do alumnado, a administración non só elimina un servizo fundamental senón que tampouco informou aos responsables do colexio sobre cando se podería restablecer a praza.