O BNG pide ao Concello da Coruña máis limpeza e prevención de incendios en Novo Mesoiro e nos núcleos rurais
O Grupo Municipal do BNG vén de rexistrar no Concello unha serie de preguntas dirixidas ao Goberno Local sobre as medidas de prevención de incendios nos barrios rurais da cidade, con especial atención á contorna de Novo Mesoiro, logo do lume producido a pasada semana na canteira de Moucho.
O concelleiro nacionalista David Soto explicou que a veciñanza vive con preocupación a acumulación de maleza e lixo nos terreos próximos ao barrio. Recordou, ademais, que a Asociación Veciñal de Novo Mesoiro xa reclamou accións concretas: a retirada inmediata dos vertidos ilegais, un mantemento constante das zonas verdes, sancións exemplares a quen use o monte como vertedoiro e a recuperación ambiental das zonas queimadas mediante procesos participativos de reforestación.
Segundo Soto, o BNG leva anos advertindo da necesidade de rozas regulares en barrios como Feáns, Mesoiro, Urbanización Breogán, A Silva ou o Núcleo do Bosque, todos eles con risco elevado de incendios. Con todo, a frecuencia e intensidade destas actuacións seguen a ser “claramente insuficientes”, o que provoca acumulación de maleza e aumenta o perigo de novos lumes. No caso concreto de Novo Mesoiro, Soto salientou que é habitual atopar terreos sen segar e residuos abandonados, especialmente nas zonas lindeiras aos camiños de Feáns e Castro de Elviña.
Por iso, o BNG pregunta ao Goberno Local cal é a frecuencia de roza prevista nas zonas públicas do barrio, cantos requirimentos se fixeron a particulares para limpar as súas parcelas, se existe un plan específico contra os vertidos ilegais e cantos expedientes sancionadores se abriron ata o momento. Ademais, reclaman coñecer que medidas prevé o Concello para a recuperación das áreas afectadas polo lume e cal foi a intervención da Xunta no incendio da canteira do Moucho.