O BNG levará ao Congreso a supresión do histórico tren directo A Coruña-Barcelona
O BNG anunciou que levará ao Congreso dos Deputados a eliminación do tren directo entre A Coruña e Barcelona, unha liña histórica coñecida popularmente como 'o Shangai' e que, segundo denuncia a formación nacionalista, desaparecerá sen explicacións obxectivas por decisión de RENFE.
Os nacionalistas censuran que se suprima unha conexión ferroviaria que consideran útil, demandada e con percorrido de futuro. Sosteñen que se trata do único tren directo entre ambas cidades, un servizo que, ademais do seu valor práctico, ocupa un lugar destacado na memoria colectiva de Galicia pola súa ligazón coa emigración e polo simbolismo acumulado ao longo de máis de tres cuartos de século.
O BNG lembra que, ata a chegada de Pedro Sánchez ao Goberno, A Coruña contaba con dúas conexións directas con Barcelona, unha nocturna e outra diúrna. A primeira xa desaparecera despois da pandemia e agora, segundo advirte a formación, tamén se perde a segunda, ao reorientarse o servizo cara ao sur de Galicia. O tren pasará a cubrir unicamente o eixo das Rías Baixas, deixando sen enlace directo a cidade herculina e a súa área de influencia.
A formación aclara que apoia o reforzo das conexións ferroviarias co sur do país, pero rexeita que iso se faga a costa de reducir servizos nunha área que considera clave polo seu peso demográfico, económico e turístico. Ao seu xuízo, a decisión sitúa A Coruña nun papel secundario dentro da rede ferroviaria, obrigando ás persoas usuarias a recorrer a enlaces de media distancia e a transbordos para chegar non só a Barcelona, senón tamén a outros destinos do corredor, como León, Palencia, Burgos, Logroño, Zaragoza ou Tarragona.
O BNG advirte tamén de que esta medida agrava, na súa opinión, a perda de servizos ferroviarios na cidade e reduce a presenza da Coruña en nodos estratéxicos como a estación de Sants, en Barcelona. A formación interpreta esta supresión como un novo exemplo de desequilibrio territorial e de falta de atención ás necesidades de Galicia en materia de mobilidade.
Por todo iso, os nacionalistas reclaman a recuperación inmediata do cadro de trens existente ata o día 7, como paso previo a volver á situación anterior á pandemia. Entre as súas demandas figuran a restitución da conexión nocturna entre Galicia e Cataluña e un servizo diario con saída e chegada tanto na Coruña como en Vigo, ademais de conexións eficientes para Ferrol e Lugo. O BNG considera igualmente necesario retomar a conexión directa entre Galicia e Euskadi, inexistente na actualidade pese, segundo sinala, ao aumento da demanda de mobilidade.