O BNG esixe paralizar a ampliación da subestación de Abegondo por falta de planificación
O Bloque Nacionalista Galego presentou alegacións contra a ampliación da subestación de Abegondo, sometida a información pública o pasado 14 de xullo de 2025, e reclamou a súa paralización inmediata. Segundo os nacionalistas, o proxecto actual carece dunha autorización definitiva da subestación inicial proxectada en 2023, polo que consideran 'inadmisible' abrir agora un novo proceso sen resolver as alegacións previas formuladas pola veciñanza e diferentes institucións.
O BNG critica a proliferación de proxectos enerxéticos en Galiza sen planificación estratéxica, avaliación global de impactos nin respecto polo territorio e pola cidadanía afectada. Lembran que a oposición a esta subestación remóntase a 2016, contando co rexeitamento de colectivos veciñais, do Concello de Abegondo e da Reserva da Biosfera Mariñas Coruñesas e Terras do Mandeo. Ademais, insisten en que a expansión eólica impulsada conxuntamente polo Estado e a Xunta beneficia principalmente ás grandes eléctricas, sen ter en conta o equilibrio territorial, o patrimonio natural e cultural, e a xente do país.
O BNG tamén anunciou que levará este asunto ao Congreso e ao Parlamento galego para reclamar a denegación da autorización da subestación e do Parque Eólico Seixo, proxecto vinculado á infraestrutura e próximo ao seu emplazamento. Reivindican que se paralicen todos os proxectos eólicos en tramitación ata que se estableza unha planificación enerxética racional, equilibrada e respectuosa co medio e o territorio, que xere riqueza e emprego local.