O BNG de Oza-Cesuras critica a amortización de prazas na RPT municipal aprobada polo PP
O Bloque Nacionalista Galego de Oza-Cesuras manifestou a súa fonda preocupación pola amortización de sete prazas na Relación de Postos de Traballo (RPT) do Concello, aprobada no último pleno a proposta do Goberno local do PP.
“Esta decisón podería afectar gravemente a prestación de servizos básicos e á calidade de vida da veciñanza, especialmente a máis vulnerábel, xa que recolle a amortización de prazas de servizo de axuda no fogar ou educadora familiar”, explicou a voceira do BNG, Estefanía Busto.
A proposta, segundo indican, aprobada cos votos do PP, inclúa a redución de traballadoras do Servizo de Atención no Fogar, o que “evidencia unha falta de planificación e un descoñecemento da realidade social do noso concello, onde este servizo é cada vez máis importante debido ao avellentamento da poboación”, sinalou Busto. Ademais, lembrou que actualmente este servizo se presta de forma indirecta mediante unha concesionaria, pero advertiu que a amortización das prazas podería limitar a capacidade do Concello para recuperar unha xestión directa no futuro, como se facía no extinto Concello de Cesuras. “Recuperar a xestión directa permitiría un uso máis racional dos recursos e garantiría un servizo de maior calidade á veciñanza, ademais de axudar a resolver os problemas que vén arrastrando este servizo nos últimos anos”, engadiu a portavoz do BNG.
Ademais, as nacionalistas denuncian que recentemente se recoñeceu xudicialmente o despedimento improcedente da educadora familiar, o que demostra que o servizo se estaba prestando e, por tanto, debería terse incluído na oferta extraordinaria de emprego público de 2022 e manterse na estrutura organizativa municipal.
O BNG critica que non se presentase ningún informe de Secretaría sobre a carga de traballo nin unha análise económica que xustifique a amortización das prazas. Ademais, lembra que a normativa vixente establece que o informe de Secretaría é preceptivo e vinculante cando se altera a estrutura organizativa do Concello, afecta aos dereitos laborais do persoal ou compromete a prestación de servizos esenciais.
“A falta dese informe de Secretaría é un defecto grave do procedemento administrativo e o goberno do Partido Popular o único que fai é afondar na opacidade á que nos ten acostumadas. Amortizar estas prazas non só prexudica o emprego público, senón que tamén compromete a calidade de servizos fundamentais como o SAF”, denuncia Busto.
O BNG insta ao Goberno municipal a desistir desta proposta, que consideran lesiva para os dereitos da veciñanza, e a garantir a continuidade e calidade dos servizos públicos mediante a inclusión das prazas afectadas nas próximas ofertas de emprego público. Nesta liña, a formación nacionalista vén de presentar alegacións á decisión do Partido Popular.