O BNG de Oleiros leva ao pleno unha moción para esixir un financiamento xusto do SAF e un modelo público de coidados
O grupo municipal do BNG en Oleiros presentará no pleno ordinario de xaneiro unha moción para reclamar un financiamento “suficiente, estábel e xusto” do Servizo de Axuda no Fogar (SAF) e avanzar cara a un modelo público de coidados. A formación defende que o SAF é unha ferramenta esencial para garantir unha vida digna ás persoas maiores, dependentes ou con dificultades de autonomía, permitindo que continúen no seu fogar e na súa contorna e evitando institucionalizacións innecesarias.
No texto, o BNG lembra que o servizo naceu en Galiza como parte dun modelo público impulsado coa aprobación da Lei de Servizos Sociais e cun sistema baseado na universalidade e na responsabilidade pública. Porén, sostén que ese esquema foi deteriorándose coa política do PP na Xunta, que (segundo argumenta) mantén un financiamento insuficiente e desequilibrado que traslada aos concellos unha parte crecente do custo dun servizo para o que non contan nin con competencias nin con recursos dabondo.
A moción advirte de que os concellos galegos soportan hoxe a maior parte do gasto do SAF, por riba dos 200 millóns de euros anuais, mentres a achega autonómica resulta “claramente insuficiente”. O BNG engade que o prezo máximo por hora fixado pola Xunta está lonxe da realidade das licitacións, que xa superan os 24 euros/hora en moitos municipios. Nese sentido, lembra que a Orde do 2 de xuño de 2023 estableceu un módulo máximo de 12 euros/hora e que, malia o compromiso de revisar os custos, esa actualización non se materializou.
A formación tamén critica o sistema de pagamentos: mentres os concellos pagan mensualmente ás concesionarias con prazos que non superan os 30 días, a Xunta liquida a súa achega con carácter trimestral e, nalgúns casos, con atrasos de varios meses. Esta dinámica, sinala o BNG, obriga as administracións locais a adiantar fondos propios para garantir a continuidade do servizo, xerando tensións de tesourería e dificultades no pago a provedores.
Segundo expón o grupo nacionalista, o infrafinanciamento ten efectos directos na calidade da atención e nas condicións laborais dun sector “altamente feminizado”, no que denuncia precariedade salarial, un convenio colectivo caducado desde hai máis dunha década e carencias en prevención de riscos adaptadas á realidade do traballo. Ademais, advirte de que a crecente complexidade administrativa satura os servizos sociais municipais e incrementa as desigualdades territoriais no acceso ao SAF.
No apartado de acordos, o BNG de Oleiros propón reclamar á Xunta e ao Estado un incremento progresivo do financiamento ata que a Xunta aboe 17 euros/hora con carácter retroactivo desde xaneiro de 2025, 20 euros/hora en 2026 e que se asuma o 100% dos custos en 2027. A maiores, pide impulsar un novo modelo público de coidados, substituíndo o actual sistema “baseado en horas” por un modelo integral e personalizado, coa creación dun organismo específico para os servizos sociais, “similar ao SERGAS”, que permita atender de xeito máis eficiente ás persoas dependentes.
A iniciativa inclúe tamén dar traslado da moción á Presidencia da Xunta, á Consellería de Política Social e Igualdade, ao Goberno do Estado, á Fegamp, aos grupos do Parlamento e aos concellos da comarca, convidándoos a promover acordos no mesmo sentido.