O BNG de Betanzos impulsa un plan municipal para fortalecer o turismo
O BNG de Betanzos presentará ao goberno local unha iniciativa para a elaboración dun Plan Municipal de Turismo, co obxectivo de establecer estratexias claras que guíen o desenvolvemento turístico da cidade de forma sostible e competitiva. Segundo explicou a concelleira Vanessa Rey, “Betanzos conta cun potencial turístico importante, que aporta beneficios económicos, pero tamén xera retos para o día a día da veciñanza. Este plan permitirá xestionar tanto os aspectos positivos como os negativos”.
O documento pretende definir unha folla de ruta que sitúe a Betanzos como un destino de referencia na provincia da Coruña, garantindo un turismo que sexa vantaxoso para toda a comunidade local.
No mesmo pleno, o BNG presentará ademais unha proposta para mellorar as redes municipais de abastecemento de auga potable e saneamento, afectadas por diversas avarías nas últimas semanas. As nacionalistas sinalan que estas infraestruturas “foron construídas hai décadas con materiais pouco resistentes e só recibiron reparacións puntuais”, polo que demandan un estudo exhaustivo do seu estado tanto no Casco Histórico como no núcleo urbano e na zona rural.
A iniciativa inclúe a elaboración dun cronograma de actuacións para a renovación e reparación das áreas máis deterioradas, co obxectivo de garantir un servizo de calidade e evitar problemas futuros para a veciñanza.