O BNG de Betanzos demanda un aseo na consulta de xinecoloxía no centro do Carregal
O BNG de Betanzos realizou unha solicitude no Pleno para que o Concello lle demande ao SERGAS a instalación dun aseo na consulta de xinecoloxía do centro de especialidades do Carregal. O edil nacionalista Salvador González lembrou que o centro de saúde lle dá atención á veciñanza de toda a comarca.
O BNG trasladou o malestar das usuarias da consulta de xinecoloxía “pola falta de baño dentro da propia consulta de xinecoloxía, o que as obriga a saír ao corredor e acceder aos baños comunitarios á vista de todo o que alí se atopa esperando outras consultas”, explicou o concelleiro do BNG. “Isto supón unha falta grave de intimidade e provoca incomodidade ao verse expostas, sobre todo nas mulleres máis novas” relatou.
Neste sentido, instou ao Goberno local a demandar á Xunta que se poña fin a esta situación. De igual forma, o BNG presentou unha emenda aos orzamentos da Xunta para dotar de persoal abondo o centro de atención primaria do Carregal e máis para corrixir as eivas nas instalacións.