O BNG da Coruña denuncia o abandono do CEIP de Prácticas e esixe accións urxentes
"O Colexio de Educación Infantil e Primaria (CEIP) de Prácticas, situado no edificio da Normal, atópase nun estado de deterioro debido á "falta de atención por parte de dous gobernos, o galego e o local", segundo denunciou a deputada do BNG Mercedes Queixas.
A tamén concelleira lembrou que as familias levan tempo reclamando melloras no mantemento e conservación do centro, sen recibir ningunha resposta por parte das administracións. Como mostra deste abandono, Queixas sinalou problemas estruturais como humidades, desprendementos de cascotes en zonas de paso para as crianzas, árbores sen podar, portas e mobiliario deteriorados, e incluso a falta de revisións na instalación eléctrica e nas ventás. Esta situación, segundo traslada, levou á ANPA a mobilizarse en demanda de instalacións dignas e seguras para a comunidade educativa. "Todo o noso apoio ás súa reivindicacións", subliñou a deputada.
Diante desta situación, Queixas vén de rexistrar varias iniciativas no Parlamento galego, incluíndo unha proposición non de lei e preguntas orais e por escrito, para esixir accións urxentes. Entre as medidas propostas, insta ao Goberno galego a avaliar o "deterioro" das instalacións e a planificar unha reforma integral con cronograma de actuacións, garantindo que as melloras máis urxentes se inicien con cargo aos orzamentos de 2025 e contando coa participación da comunidade educativa.
Ademais, sendo que o CEIP Prácticas se atopa na Normal grazas a un convenio entre a Universidade da Coruña (propietaria do inmóbel) e o Concello, a deputada do BNG propón impulsar unha mesa de negociación para actualizar este acordo de colaboración. O obxectivo é reforzar a oferta educativa do centro e garantir unhas condicións axeitadas para o alumnado e profesorado.