O BNG da Coruña advirte que o Goberno local recoñece a titularidade municipal da Estación de Autobuses
O BNG da Coruña vén de trasladar que, segundo resposta do Goberno municipal a unha pregunta formulada pola concelleira nacionalista Avia Veira, a Estación de Autobuses da cidade “é propiedade municipal”, a pesar de que a Xunta de Galicia continúa reclamando a titularidade da infraestrutura.
Veira preguntou por escrito se Concello e Xunta resolveran xa o conflito sobre quen é o titular da estación. Na súa resposta, o Executivo de Inés Rey sinala que “o Concello busca evitar as disputas con outras administracións”, pero deixa claro que “a estación é propiedade municipal”.
A concelleira do BNG tamén inquiriu ao Goberno local sobre os plans que ten para o futuro uso do espazo que quedará libre unha vez os autobuses se trasladen á nova terminal intermodal. Porén, o Concello non achega detalles concretos e limítase a afirmar que “o Goberno Municipal está a traballar no futuro uso da estación de autobuses, unha vez quede libre polo traslado á Intermodal”.
Desde o BNG reclaman máis transparencia sobre os proxectos previstos para este emprazamento estratéxico da cidade e lembran a importancia de que calquera decisión ao respecto sexa acordada co conxunto da veciñanza.