O BNG cuestiona o pago de facturas das festas de Oza 2024 ao contar cun informe en contra de Intervención

A formación nacionalista rexeita no pleno que o Concello asuma dúas facturas da comisión de festas e interpreta a abstención do PP na súa propia proposta como un intento de trasladar ao resto de grupos a responsabilidade da decisión

O grupo municipal do BNG en Oza-Cesuras votou en contra da proposta levada a pleno polo goberno local para que o Concello asumise o pago de dúas facturas ligadas ás festas parroquiais de Oza de 2024, ao entender que o procedemento non se axusta á normativa vixente.

Segundo explicou a concelleira nacionalista Estefanía Busto, trátase de dous recibos emitidos a nome da comisión de festas parroquial e incorporados á orde do día do último pleno ordinario para seren abonados con cargo ás arcas municipais. A portavoz indicou que estas facturas chegaron acompañadas dun informe desfavorable da Intervención municipal no que se advirte de que o Concello non pode asumir directamente gastos que corresponden a terceiros, por considerarse contrario ao ordenamento xurídico.

Busto sinalou que existen mecanismos regulamentados para apoiar economicamente ás comisións de festas, como as subvencións nominativas ou os convenios específicos, que obrigan a xustificar o destino dos fondos públicos. Ao seu xuízo, acudir a estas vías sería a fórmula axeitada para colaborar co tecido asociativo, e non a asunción directa de facturas emitidas por unha entidade allea á administración local.

Outro dos aspectos que o BNG puxo de relevo é o sentido do voto do grupo de goberno. A concelleira explicou que o alcalde e os edís do PP se abstiveron na votación da súa propia proposta, pese a dispor de maioría absoluta na corporación. Para Busto, este xesto supón que o executivo 'deixa nas mans do pleno unha decisión da que debería facerse cargo o goberno municipal' e evidencia as dúbidas que, ao seu entender, suscita o contido do informe de Intervención.

A formación nacionalista defende que o reparo formulado polos servizos económicos xustifica o voto en contra e insiste en que non asume a responsabilidade de avalar un procedemento que considera irregular. Ademais, advirte de que a eventual asunción destas facturas podería xerar agravios comparativos con outras comisións de festas do municipio que tramitan as axudas polos cauces habituais.

No comunicado remitido polos nacionalistas non se recollen os argumentos expostos polo PP para xustificar a proposta nin a súa abstención na votación. O BNG avanza, en todo caso, que continuará a facer seguimento deste tipo de expedientes e reclama que calquera apoio económico municipal ás festas parroquiais se canalice por vías expresamente previstas na lexislación.