O BNG considera 'inexplicábel' que A Coruña siga sen residencia universitaria pública da Xunta
O BNG denunciou hoxe a ausencia de residencias universitarias públicas dependentes da Xunta na cidade da Coruña e cualificou a situación de 'inexplicábel'. A deputada Mercedes Queixas presentou unha serie de iniciativas parlamentarias —entre elas proposición non de lei para pleno e comisión, interpelacións e preguntas orais e por escrito— para reclamar medidas urxentes que garantan aloxamento accesíbel ao alumnado da UDC.
Entre as propostas que o grupo nacionalista esixe figuran a oferta de prazas en residencias públicas mediante a rehabilitación de inmobles existentes e a construción de novas instalacións en terreos pertencentes á administración autonómica. Ademais, Queixas solicita a creación dunha bolsa de vivenda pública en réxime de aluguer en A Coruña pensada especificamente para estudantes de formación superior, que se nutriría por compra, rehabilitación e promoción de vivendas novas.
O BNG reclama tamén que se reserve unha porcentaxe das vivendas que se planifiquen en soares recentemente cedidos polo Concello da Coruña para destinalas ao estudantado en réxime de aluguer a prezos accesíbeis. Como exemplo, sinala a parcela cedida en Xuxán, un barrio de nova creación moi preto do campus de Elviña, onde dispoñer de vivenda pública de aluguer sería 'moi importante' para facilitar o acceso á contorna universitaria.
Queixas alerta de que a combinación entre a escalada 'abusiva' dos prezos do aluguer, a insuficiente oferta de vivenda e a falta de prazas en residencias universitarias públicas crea un 'contexto de crise extrema' que condiciona, cando non impide, o acceso ao estudo universitario na cidade. 'A Xunta ten competencias exclusivas en materia de vivenda. Tén que comezar a exercelas; o seu balance na Coruña desde 2009 é paupérrimo. Cómpre un cambio de rumbo e non hai tempo que perder', subliña a deputada.
O BNG pide que a Xunta actúe con urxencia e lembra que, máis alá das actuacións de promoción e rehabilitación, é necesario deseñar mecanismos para garantir prazas estables e un parque de vivenda pública que permita ao estudantado compatibilizar a formación coa garantía dunha vivenda digna.