O Birloque inaugura un centro cívico moderno e accesible tras unha reforma integral
O Birloque estrea nova vida comunitaria coa apertura do seu renovado centro cívico, un espazo totalmente reformado que busca converterse no corazón social e cultural do barrio. A inauguración celebrouse coa presenza da alcaldesa, Inés Rey, que puxo en valor unha intervención que supuxo un investimento próximo ao millón de euros, financiado con fondos europeos.
O novo equipamento destaca pola súa funcionalidade, accesibilidade e modernidade. Conta con salas polivalentes con acceso independente desde o exterior, espazos para actividades, sala de informática, despachos destinados a entidades e servizos sociais, ademais de zonas comúns melloradas para o uso diario da veciñanza.
Durante o acto, Inés Rey subliñou que o centro “é un símbolo do compromiso local co barrio e coa igualdade de acceso aos servizos públicos en toda a cidade”. A rexedora incidiu en que “non hai barrios de segunda; todos e todas temos dereito a espazos dignos para vivir, aprender, medrar e compartir”.
A posta en marcha da programación do centro realizarase de forma progresiva e con protagonismo da veciñanza. A partir deste luns iniciarase un proceso de participación, dinamizado por unha profesional, co obxectivo de recoller propostas sobre os horarios e as actividades que se desenvolverán no centro. Unha vez rematado, o espazo quedará plenamente integrado na rede municipal de centros cívicos.