O barrio coruñés de Palavea prepárase para celebrar as festas de Santo Antonio e Santa Cristina
A asociación veciñal Os Nosos Lares xa fixo público o cartel das tradicionais festas patronais de Palavea, que se celebrarán os días 14 e 15 de xuño. O evento, que abrangue tamén os barrios de Santa Xema, Río de Quintas e a zona da Ponte da Pasaxe, ofrece unha programación diversa con música, cultura e actividades para toda a veciñanza.
As celebracións comezarán o sábado 14 de xuño ás 11.00 horas cunha sesión vermú a cargo do grupo Miami, e continuarán ás 16.00 horas coa actuación do grupo de musicoterapia de Abegondo e Palavea dirixido por Luis “Fixoi”, exbatería de Os Satélites. Xa ás 17.00 horas será a quenda da cultura urbana con Vella Escola e o seu obradoiro de beat box e exhibición.
A programación seguirá ás 18.30 horas cunha actuación da Agrupación Folclórica Aturuxo e un obradoiro de esgrima a cargo do Club coruñés 100 Tolos. A música da tarde-noite estará protagonizada por The Muppets, grupo de versións de rock, e ás 22.00 horas subirá ao escenario Pili Pampín, un referente da música galega tradicional. Pechará a xornada a sesión DJ de DJ Male, coñecido polas súas mesturas de música urbana e techno.
O domingo 15, as actividades comezarán ás 10.00 horas coa alborada da Asociación Folclórica Folerpas e ás 12.00 horas terá lugar a tradicional misa na capela de San Eduardo, que só abre para esta ocasión, seguida dunha procesión cos santos patronos, Santo Antonio e Santa Cristina.
Xa pola tarde, arredor das 14.00 horas, Begoña García amenizará a sesión vermú. A festa continuará coa música da Asociación Cultural La Trova, unha festa da escuma a cargo de Peques Park e unha área infantil de xogos na praza. As actuacións finais correrán a cargo do grupo de rock Mr. Kamándula ás 19.00 horas e da Orquesta Sinfonía ás 21.00 horas.
A asociación “Os Nosos Lares” salientou que “o novo procedemento é máis moderno, transparente e áxil”, en comparación co modelo anterior. O cartel deste ano foi ilustrado pola artista María Alberte Murga (@marialberza), sendo a terceira muller en realizar o deseño das festas, tras Sara Iglesias Vázquez e Patricia Saavedra Guillín.