O Auditorio Gabriel García Márquez acollerá a obra 'Reconversión' de Ibuprofeno Teatro
O sábado 15 de marzo ás 20.30 horas, o Auditorio Gabriel García Márquez será o escenario da obra teatral 'Reconversión', da compañía Ibuprofeno Teatro e dirixida por Santiago Cortegoso.
'Reconversión' propón unha viaxe desde a posguerra ata o "Felipismo" dos anos 80, pasando polo auxe da industria siderúrxica e a transformación dunha sociedade rural cara a un modelo capitalista. Trátase dun exercicio de memoria histórica arredor da reconversión do sector naval na Ría de Vigo, centrado na historia do pai do autor, un traballador do estaleiro Ascón durante 30 anos. A súa figura representa as vivencias dunha xeración que sufriu o paro polo peche da factoría en 1984 e participou nas mobilizacións históricas dos anos 70 e 80.
A obra, de xénero contemporáneo e cunha duración de 100 minutos, está dirixida a un público adulto, recomendado para maiores de 12 anos. No seu elenco participan Artur Abad, Cristina Collazo, Santiago Cortegoso, César Goldi, Celia González, Davide González, Fran Lareu e Nani Matos.