O Auditorio de Arteixo acolle este venres a obra 'Territorios de Liberdade'
Este venres, 17 de xaneiro, ás 20:30 horas, o Auditorio de Arteixo converterase no escenario de 'Territorios de Liberdade', unha obra teatral dirixida por Quico Cadaval e coproducida pola Companhia Certa da Varazim Teatro (Portugal), o Centro Dramático Galego e Tanxarina Monicreques.
A liberdade é un concepto dinámico, influenciado polo tempo, o espazo e as vivencias individuais. Territorios de Liberdade toma como punto de partida o 25 de abril de 1974, día no que a Revolución dos Caraveis puxo fin á ditadura en Portugal, para explorar como este concepto evoluciona ao longo da vida, en diferentes épocas e territorios.
A obra destaca pola súa natureza participativa, xa que incorpora reflexións e preguntas da comunidade sobre o significado da liberdade, ofrecendo unha perspectiva enriquecida e plural. Esta proposta cultural serve non só como unha celebración dos 50 anos da Revolución dos Caraveis, senón tamén como unha chamada á reflexión sobre os dereitos e valores que sustentan as sociedades contemporáneas.
As entradas poden adquirirse en liña ou no despacho de billetes do CCC de Arteixo Manuel Murguía o mesmo día da función, en horario de 11:30 a 13:30 horas ou desde dúas horas antes do inicio.