O Atlantic Pride premia a creatividade literaria e reivindica a diversidade na súa sexta edición
A Coruña converteuse esta fin de semana nun fervedoiro de cultura, diversidade e celebración coa clausura do Atlantic Pride 2025, que puxo o broche de ouro á súa programación coa entrega de galardóns do IV Certame de Literatura LGTBIQ+, unha das citas culturais máis destacadas do festival.
O primeiro premio recaeu en Manuel Iglesias Vila polo seu relato Que vai ser de nós cando sexamos vellos?. O segundo galardón foi para Óscar Vila Ferreiro, autor de No solpor, mentres que o terceiro posto foi para María Salinas García por Groenlicia. As tres obras, redactadas en galego, orixinais, inéditas e cun vínculo temático coa diversidade LGTBIQ+, foron recoñecidas con premios de 600, 300 e 100 euros, respectivamente.
A entrega de premios celebrouse nos Xardíns de Méndez Núñez como parte da xornada final do festival, pouco antes das actuacións de Anabel Conde, Kuve, David Civera e o dj Iván Flashback.
O certame, promovido polo Atlantic Pride en colaboración coa Rede de Bibliotecas Municipais da Coruña a través do club de lectura QUEERuña, naceu en 2022 co obxectivo de visibilizar as diversidades sexuais e de xénero e vivenciar as experiencias minorizadas de todas as persoas LGTBI+.
Música, drags e orgullo no norte
Coñecido xa como o ‘Orgullo do Norte’, o Atlantic Pride celebrou do 6 ao 13 de xullo a súa sexta edición como un espazo aberto, seguro e inclusivo, cunha ampla programación de concertos, espectáculos e actividades culturais que reuniron a milleiros de persoas nas rúas da Coruña. Na edición anterior, máis de 25.000 asistentes participaron nun festival que, un ano máis, reivindicou a liberdade afectiva, sexual e de identidade desde unha perspectiva lúdica e transversal.
Este evento está impulsado pola Asociación Orgullo Coruña (ORCO), co patrocinio do Concello da Coruña e o apoio da Deputación da Coruña, ademais do respaldo de empresas como Estrella Galicia, Coruña The Style Outlets e Globalgrafic.
Nesta edición, o cartel musical estivo encabezado por cinco grandes divas do pop estatal: Judeline, Edurne, Nia, Merche e Paula Koops. Xunto a elas, artistas da escena galega como De Ninghures, Coolnenas, Agoraphobia, Alana, LERIA, ELBA ou Rivadulla puxeron en valor o talento local.
Completaron a programación iconas da cultura e da música LGTBIQ+ como Jimena Amarillo, Mayo, Sofía Cristo e Cascales, ademais dunha destacada presenza de drags, con nomes como Samantha Ballentines, Arantxa Castilla-La Mancha & OnyX Unleashed, Yasmine Lutar, RRRITA ou Gaylicia, entre moitas outras.
A festa prolongouse tamén coa ‘Afterpartie Raíña-me!’, organizada o sábado 12 de xullo no local Claro Boba! en colaboración co programa da TVG Raíña-me!, con actuacións de Alexa Evans, Marisa Prisa e Kim Miller a partir das 2.30 da madrugada.