Deportes

O piloto asinou a pole e gañou as dúas mangas na categoría Rookie (Vortex) na primeira cita puntuable da tempada 2026, marcada pola chuvia e unha alta participación

O Campionato Xunta de Galicia de Karting 2026 botou a andar a pasada fin de semana no Circuíto Municipal de As Pontes, nunha proba condicionada pola meteoroloxía e cunha inscrición que superou o cento de equipos.

Entre os nomes propios da xornada destacou o arteixán Álex Fernández, que se impuxo con autoridade na categoría Rookie (Vortex). O mozo piloto foi o máis rápido na sesión cronometrada, logrou a pole position e confirmou o seu dominio cunha vitoria nas dúas carreiras disputadas, pechando un fin de semana redondo.

No podio desta categoría acompañárono Carmen Pintor e Lucas Pardo, segundo e terceiro respectivamente, nunha carreira na que Fernández marcou o ritmo de principio a fin.

Con este inicio, o piloto de Arteixo, de só 7 anos, dá un paso importante no seu debut oficial do ano e sitúase como un dos aspirantes a seguir nas próximas probas do calendario autonómico.