O Aquarium Finisterrae exhibe as mellores fotografías de natureza do ano nunha exposición estival
O Aquarium Finisterrae acolle este verán a exposición ‘Fotógrafos da Natureza 2025’, unha mostra que reúne 85 imaxes premiadas no certame European Wildlife Photographer of the Year, organizado pola Sociedade Alemá de Fotografía de Natureza (GDT). Trátase dun dos concursos máis prestixiosos do mundo no ámbito da fotografía de natureza, que ten como obxectivo sensibilizar sobre a importancia de preservar o medio ambiente.
A mostra chega da man do Concello da Coruña e poderá visitarse durante toda a tempada estival. “Desde o Goberno de Inés Rey entendemos que os museos científicos son espazos vivos nos que teñen cabida numerosas mostras temporais que enriquecen o seu contido permanente, como é o caso desta e de tantas outras que promovemos ao longo do ano”, sinalou o concelleiro de Cultura e Turismo, Gonzalo Castro.
A exposición estrutúrase en nove seccións temáticas: Aves, Mamíferos, Outros animais, Mundo submarino, Eloxio das plantas, Paisaxes, O ser humano e a natureza, Forma e composición e Novos fotógrafos. Nesta edición participaron 928 fotógrafos e fotógrafas de 38 países, que presentaron un total de 18.000 imaxes. Entre as seleccionadas, 15 son obra de profesionais do Estado español.
O gañador absoluto desta edición foi Jaime Rojo coa fotografía titulada "No bosque das monarcas", unha imaxe tomada no Santuario de El Rosario, en México. A instantánea vai acompañada dun texto explicativo do propio autor, onde destaca a delicada relación entre as bolboretas monarca e o seu hábitat:
“As bolboretas monarca (Danaus plexippus) hibernan aniñadas nas árbores do Santuario da Bolboreta Monarca de El Rosario, en México. O clima a esta altitude é fresco e relativamente húmido, e as bolboretas adaptáronse ás mesmas condicións ecolóxicas que as árbores, na súa maioría abetos de Oyamel (Abies religiosa). As copas das árbores protexen ben as bolboretas das inclemencias do tempo e favorecen a súa congregación en grandes cantidades, pero mesmo o cambio máis pequeno na masa forestal podería ter un impacto negativo no sensible microclima ao que se adaptaron estes animais. A deforestación seguía sendo un problema a principios da década do 2000, malia as medidas de conservación que conduciron á creación desta zona protexida. Unha coalición internacional de gobernos e organizacións ecoloxistas sen ánimo de lucro liderada por México creou un fondo fiduciario para traballar coas comunidades locais co fin de reducir a deforestación, que diminuíu de forma constante desde 2009.”
‘Fotógrafos da Natureza 2025’ ofrece ao público unha oportunidade única para achegarse á diversidade natural do planeta a través da mirada de profesionais de todo o mundo, poñendo en valor o poder da imaxe como ferramenta de sensibilización ambiental.