O Aquarium Finisterrae acollerá a Feira de Ciencia Isabel Zendal
O Concello da Coruña colabora coa Universidade da Coruña (UDC) na organización da Feira de Ciencia Isabel Zendal, que se celebrará o próximo sábado 1 de febreiro no Aquarium Finisterrae. Este evento permitirá ao público achegarse á ciencia a través de catorce talleres divulgativos impartidos por profesorado e alumnado da UDC, combinando experimentos, xogos e actividades prácticas.
Durante esa xornada, o Aquarium Finisterrae abrirá as súas portas de forma gratuíta. Para participar nos talleres será preciso reservar entrada previamente mediante a plataforma de ticketing do Concello, que estará dispoñible a partir das 9.00 horas do mércores 29 de xaneiro. Como excepción, as persoas maiores de 65 anos poderán acceder sen reserva, acompañadas doutra persoa se o precisan. O persoal que coordinará as actividades estará caracterizado como os protagonistas da Real Expedición Filantrópica da Vacina, incluíndo a representación de Isabel Zendal e Francisco de Balmis, interpretados por Ana González Tizón e Andrés Martínez Lage, respectivamente. Os nenos vacuníferos tamén estarán representados polos alumnos participantes.
A feira incluirá actividades moi variadas e relacionadas coa biodiversidade mariña que se pode observar no Aquarium, así como con temas de saúde e bioloxía. Un dos talleres explorará as extraordinarias características do tiburón de Groenlandia, destacando o seu singular comportamento e as súas adaptacións fisiolóxicas. Outros afondarán na camuflaxe dos polbos, explicando como e por que cambian de cor para adaptarse ao seu entorno. Tamén haberá actividades centradas en animais únicos, como o axolote, que permitirá aos participantes descubrir o proceso de neotenia a través de xogos e crebacabezas.
Propostas máis interactivas invitarán o público a crear os seus propios peixes mutantes ou a aprender sobre a bioloxía dos cangrexos. Outras actividades abordarán avances tecnolóxicos como a edición xenética mediante CRISPR-Cas9, o papel dos telómeros no envellecemento, e como as embarcacións manteñen o equilibrio grazas ao seu centro de gravidade. Tamén se tratarán temas relacionados coa saúde, como a importancia das vacinas, o funcionamento do sistema inmune e o impacto da vitamina C no organismo, ademais dunha introdución ao mundo dos virus e os seus efectos nos hospedadores. Por último, haberá un taller dedicado a primeiros auxilios, reanimación cardiopulmonar e consellos para unha vida máis saudable.
Esta feira, organizada por UDCiencia d+i en colaboración co Aquarium Finisterrae, rende homenaxe á Real Expedición Filantrópica da Vacina que partiu do porto da Coruña o 30 de novembro de 1803, destacando a figura de Isabel Zendal como símbolo desta xesta histórica.