O alumnado do CEIP Portofaro de Cambre organiza unhas eleccións simuladas
Os estudantes de 5º de Primaria do CEIP Portofaro viviron esta semana unha experiencia única coa celebración dunhas eleccións simuladas, recreando con todo luxo de detalles o proceso electoral. Un total de nove formacións políticas presentáronse aos comicios, nos que expuxeron os seus programas electorais ante a alcaldesa de Cambre, María Pan, e o resto de compañeiros de clase. Tras os discursos de peche de campaña, procedeuse á votación, na que o Partido Popular Estudantil de Portofaro (PPEP) resultou gañador con 11 votos.
Durante o desenvolvemento da actividade, a rexedora explicou ao alumnado o funcionamento das eleccións municipais, abordando aspectos como o sistema electoral, o reconto e a tipoloxía dos votos. Ademais, Pan Lesta aproveitou para explicarlles como se desenvolven os plenos municipais. A alcaldesa felicitou a todos os nenos e nenas polo traballo realizado, destacando especialmente o labor da alumna Ana Sofía Machado Abreu, representante da formación gañadora.
Propostas gañadoras e alternativas
O PPEP acadou a vitoria cun programa no que se comprometía a organizar unha actividade ao aire libre unha vez ao mes para trasladar a aula ao exterior, fomentar a aprendizaxe doutros idiomas e o repaso dos contidos impartidos a través de certames de pronunciación, gramática, oratoria e matemáticas, e instaurar un Día Saudable mensual para promover hábitos de alimentación equilibrada entre o alumnado.
Pola súa parte, as demais formacións tamén presentaron diversas propostas para mellorar o centro educativo. Entre as máis repetidas destacaron o cambio no menú do comedor, a organización de máis actividades de lecer como xincanas, o reforzo da seguridade na entrada do colexio e o arranxo ou ampliación de servizos no CEIP Portofaro.
Esta iniciativa permitiu que o alumnado coñecese de primeira man como funciona o sistema democrático, fomentando valores como a participación, o debate e a toma de decisións en grupo.