O alumnado de Culleredo reflexiona sobre a moda e o seu consumo a través do teatro
Arrancou en Culleredo a actividade 'Teatralízate: Alta Costura', unha iniciativa que conxuga arte escénica e reflexión social dentro do programa EducaCulleredo. O alumnado do IES Rego de Trabe, do IES Blanco Amor e do Centro A Escada participará nesta proposta que inclúe a representación da nova obra de teatro da compañía Elefante Elegante, seguida dun debate sobre a moda e o seu impacto no consumo actual.
Nesta primeira sesión estiveron presentes a tenente de alcalde, Cristina Pardo, e a concelleira de Cultura, Penélope López, apoiando a iniciativa e destacando a importancia de abordar cuestións sociais a través de formatos innovadores.
O proxecto busca fomentar o pensamento crítico entre a mocidade e promover un uso consciente da moda, combinando aprendizaxe e expresión artística nunha experiencia enriquecedora para o estudantado.