O alcalde de Culleredo, José Ramón Rioboo, defende a independencia dos medios de comunicación
“Para que un medio de comunicación como este funcione, debe ser libre e independente, xa que só así poderá informar con obxectividade e cumprir cunha necesidade e un dereito fundamental: que todos os habitantes dunha localidade estean debidamente informados”, apuntou o alcalde de Culleredo, José Ramón Rioboo. Participou no programa 'A Terraza' de Radio Culleredo (101.2 FM) con motivo do Día Mundial da Radio, que se celebra cada 13 de febreiro.
Durante a súa intervención, Rioboo quixo felicitar a todos os profesionais que fan posible este medio, ao que cualificou como “corazón, proximidade e o máis inmediato de todos”. “A radio forma parte das nosas vidas e, por iso, debemos apreciala, recoñecela e conservala", sinalou o alcalde. Ademais, destacou a importancia das emisoras municipais, que deben manter a obxectividade para ofrecer “programas atractivos” á cidadanía.
Rioboo, que foi presentador e posteriormente director da emisora municipal, lembrou a súa traxectoria no mundo radiofónico e defendeu a liberdade e independencia dos medios locais.
Durante a súa intervención, tamén compartiu algunhas anécdotas dos seus inicios no sector da comunicación, que lembrou "con especial cariño", destacando o papel que xogou a radio na súa vida antes da súa entrada na política.