O alcalde de Coirós califica o vertido de entullos en Pena Furada como 'un ataque destrutivo' á natureza e ao patrimonio
O Concello de Coirós vén de denunciar un novo vertido de residuos de obra no xacemento arqueolóxico de Pena Furada, un dos enclaves rupestres máis singulares da provincia da Coruña. Segundo informou o goberno local, veciños da zona localizaron esta mañá máis de corenta sacos cheos de entullos de construción esparexidos pola ladeira do xacemento. Todo indica, pola natureza dos restos, que proceden das obras de reforma dunha vivenda situada a poucos quilómetros do lugar.
Trátase da terceira vez que os propietarios dos montes onde se produciu o vertido se ven obrigados a presentar denuncia por feitos similares, o que, ao xuízo do Concello, evidencia unha reincidencia preocupante neste tipo de condutas. Durante a descarga do material, o panel informativo instalado no acceso ao xacemento quedou tamén completamente destruído.
O alcalde de Coirós, Francisco Quintela, cualificou o ocorrido como 'un ataque destrutivo contra o medio natural e o patrimonio cultural de todos'. O rexedor subliñou que quen actúa deste xeito 'non respecta nada, porque quen ataca á natureza atenta contra a súa propia vida e quen estraga o patrimonio cultural rompe os lazos que nos permiten sentirnos identificados e integrados nunha comunidade humana'.
Pena Furada, situada na parroquia de Santa Mariña de Lesa, é un santuario rupestre galaico-romano asentado nun outeiro granítico a uns 280 metros de altitude, entre os ríos Mandeo e Mendo. No lugar destaca a figura de A Moura, un petróglifo feminino de preto de 65 centímetros de lonxitude, cun forte simbolismo ligado a antigos cultos e á luz solar, que converten o conxunto nun xacemento de alto valor arqueolóxico. O sitio está incluído na Reserva da Biosfera Mariñas Coruñesas e Terras do Mandeo e foi declarado Ben de Interese Cultural en 2015.
Quintela explicou que xa solicitou á Garda Civil que empregue todos os medios ao seu alcance para identificar os autores do vertido e depurar responsabilidades. Ao mesmo tempo, fixo un chamamento á veciñanza para que traslade ás autoridades calquera pista ou indicio que poida axudar a localizar as persoas responsables.
O Concello lembra que, ademais do impacto visual e ambiental, este tipo de accións supoñen un risco directo para a conservación dun espazo que nos últimos anos foi obxecto de traballos de limpeza, investigación e posta en valor para facilitar a súa visita e difusión.