O acto de presentación do libro de Bebeto en Ordes colga o cartel de aforo completo
O Auditorio da Casa da Cultura de Ordes quedou pequeno para acoller a presentación do libro de Bebeto. O Concello anunciou que o evento ten xa o aforo completo grazas ás reservas realizadas a través do formulario habilitado, e agradeceu a enorme acollida da veciñanza e dos afeccionados ao histórico dianteiro deportivista.
As persoas que tramitaron a súa reserva previa poderán acceder ao auditorio nun tramo de acceso anticipado, entre as 16.30 e as 17.30 horas. Unha vez rematado ese horario, e unicamente no caso de que aínda queden butacas libres, a entrada pasará a ser de acceso libre ata completar capacidade.
Desde as 16.30 horas funcionará tamén un posto de venda de exemplares na entrada da Casa da Cultura, de maneira que quen o desexe poderá mercar o libro antes do comezo do acto e telos despois dispoñibles para a sinatura. Na parte final da presentación abrirase a quenda de firmas con Bebeto, dirixida exclusivamente aos libros.
A organización pide a colaboración do público para que a sesión transcorra do xeito máis áxil posible e todas as persoas poidan levar o seu exemplar asinado. Por este motivo recoméndase non solicitar fotos individuais co ex xogador nin levar outros obxectos para asinar (como camisolas ou balóns). Se, unha vez rematada a sinatura dos libros, aínda queda tempo dispoñible, procurarase un momento específico para fotografías e dedicatorias noutros soportes.
O Concello de Ordes salientou o carácter especial desta cita cunha das grandes lendas do SuperDépor e agradeceu a resposta masiva do público á convocatoria.