O 8M leva a escena en Culleredo o espectáculo 'Mulleres que viven soas'
O programa do 8M de Culleredo incorpora esta semana unha cita co teatro. O auditorio do Edificio de Servizos Múltiples do Burgo acollerá este venres 13 de marzo, ás 20.30 horas, a representación de 'Mulleres que viven soas', unha montaxe da compañía Berrobambán incluída na Rede Cultural da Deputación da Coruña.
A peza constrúe un formato híbrido no que se mesturan o monólogo de comedia, o teatro clásico e o documental escénico. Sobre as táboas estarán tres narradoras moi recoñecidas en Galicia, Paula Carballeira, María da Pontragha e Vero Rilo, encargadas de dar voz a relatos arredor da vida en soidade das mulleres.
A orixe desta proposta remóntase a 2019, cando Paula Carballeira impulsou para o Maratón de Contos de Guadalaxara unha sesión especial baixo ese mesmo título. Máis adiante, Berrobambán ampliou a idea cunha serie de podcast centrada en testemuños de mulleres que viven soas. Agora, ambas liñas de traballo conflúen nun espectáculo que chega a Culleredo dentro da programación conmemorativa do Día Internacional da Muller.
A entrada será gratuíta, aínda que o público deberá retirar invitación previamente. As persoas interesadas poden reservala chamando ao 981 66 55 97 entre as 16.00 e as 21.00 horas ou acudindo directamente ao Edificio de Servizos Múltiples.
A axenda do 8M en Culleredo inclúe ademais outras actividades ao longo do mes, entre elas unha charla sobre igualdade, desigualdade e recursos dispoñibles, o obradoiro 'Igualdade e Diversidade', as conferencias 'Mulleres de Culleredo que fan historia', a proxección de 'Hijas de Cynisca' e a iniciativa audiovisual '8M: Nova xeración, nova mirada'.