Novo proxecto urbano en Arteixo: humanización da Travesía co apoio da Xunta
A conselleira de Vivenda e Planificación de Infraestruturas, María M. Allegue, e o alcalde de Arteixo, José Carlos Calvelo Martínez, formalizaron a sinatura dun convenio que permitirá financiar a humanización da Travesía de Arteixo.
A actuación, que se executará no tramo comprendido entre a rotonda da AG-55 e o cruzamento coa rúa Reconquista, estará sufragada cun préstamo sen xuros de 925.000 euros procedente do Fondo de Cooperación da Xunta, dirixido a concellos de menos de 50.000 habitantes.
O proxecto contempla a creación de prazas e zonas arboradas, reducindo o espazo dedicado ao tráfico rodado para darlle prioridade ás persoas peóns. Con iso, preténdese mellorar a accesibilidade e dotar á vila dun entorno urbano máis amable e sostible.
María M. Allegue destacou que este convenio “é un exemplo da colaboración necesaria entre administracións para impulsar iniciativas con impacto real na veciñanza” e incidiu na importancia de sumar esforzos coas entidades locais no ámbito da vivenda e da planificación urbana.
O préstamo concedido deberá devolverse nun prazo máximo de oito anos. Esta achega enmárcase na convocatoria 2025 do Fondo de Cooperación, dotada con 3,7 millóns de euros e aberta a solicitudes ata o 15 de outubro. Desde a súa creación en 2017, o programa permitiu mobilizar preto de 26 millóns de euros para 106 actuacións en 50 municipios galegos.