Novo Mesoiro reclama solucións urxentes ao colapso do transporte público no inicio do curso escolar
A Asociación de Veciños de Novo Mesoiro volveu poñer sobre a mesa as carencias do servizo de bus urbano no barrio, cualificado como 'claramente insuficiente'. A entidade denuncia que no primeiro día de instituto máis de 15 nenos e nenas non puideron acceder ao autobús ao atoparse cheo, sendo finalmente os pais quen tiveron que trasladalos ao centro educativo.
Segundo a asociación, esta situación repítese cada comezo de curso a pesar das promesas de reforzos, que unha vez máis non se fixeron efectivos. 'É unha inxustiza que o alumnado quede tirado na parada e que non aprendamos dos erros ano tras ano', sinalan.
Os representantes veciñais lembran que o barrio xa amosou un forte compromiso no encontro celebrado no centro cívico de Mesoiro, onde foi un dos máis participativos na definición do futuro modelo de bus urbano. Alí expuxéronse propostas como a implantación de transbordos intelixentes, liñas nocturnas e melloras nas frecuencias, especialmente na conexión con universidades e hospitais, dado que unha viaxe de apenas catro quilómetros pode chegar a demorar ata unha hora.
A asociación subliña que esta é unha reivindicación histórica, apoiada por miles de sinaturas e múltiples reunións tanto coa empresa concesionaria como coas administracións. Por iso, reclaman que se aclare en que punto se atopan os compromisos adquiridos e que medidas se van aplicar para evitar que esta situación se repita nos próximos días.
'Non queremos que isto se entenda como unha queixa sen máis', indican, 'senón como unha chamada ao diálogo para construír, entre veciñanza e institucións, un transporte público que realmente dea resposta ás necesidades de Novo Mesoiro'.