Novo impulso á vivenda pública en Xuxán: a Xunta licita o proxecto para 264 fogares cun investimento de 50 millóns de euros
A Xunta de Galicia puxo en marcha a licitación da redacción do proxecto e da dirección de obra para construír 264 novas vivendas de promoción pública no barrio de Xuxán, unha actuación que o Goberno galego cifra nun investimento global de 50 millóns de euros.
A conselleira de Vivenda e Planificación de Infraestruturas, María Martínez Allegue, xunto coa delegada territorial da Xunta na Coruña, Belén do Campo, detallou que a Plataforma de Contratos Públicos de Galicia recolle xa este concurso por un importe superior a 1,6 millóns de euros. O prazo para presentar ofertas permanecerá aberto ata o vindeiro 27 de febreiro.
Segundo explicou a conselleira, a promoción levantarase nunha parcela propiedade da Xunta que inicialmente estaba prevista para usos terciarios, pero que finalmente se destinará a vivenda unha vez completada a modificación puntual do PXOM por parte do Concello, un cambio impulsado desde o Instituto Galego da Vivenda e Solo (IGVS).
Allegue enmarcou esta licitación dentro do paquete de vivenda pública previsto na cidade e subliñou que, con esta nova promoción, a Xunta asegura ter xa 476 vivendas de promoción pública en distintas fases de tramitación e execución na Coruña. Desa cifra, concretou, 368 corresponden a parcelas propias en Xuxán (entre elas, as 40 vivendas cuxa adxudicación provisional se sortearon o 16 de xaneiro), 101 sitúanse en parcelas cedidas polo Concello e outras 7 tramítanse ao abeiro do programa Rexurbe.