Novas incorporacións ao Atlantic Pride 2025: Jimena Amarillo, Mayo, Sofía Cristo e Cascales DJ
O Atlantic Pride 2025 segue sumando nomes ao seu cartel e confirma a participación de catro grandes iconas da música e a cultura LGTBIQ+. Jimena Amarillo, Mayo, Sofía Cristo e Cascales DJ actuarán na 6ª edición do festival, que se celebrará na Coruña do 6 ao 13 de xullo, consolidándose como o 'Orgullo do Norte'.
Jimena Amarillo, icona do pop lésbico sentimental e urbano, actuará o xoves 10 de xullo nos Xardíns de Méndez Núñez. Co seu romanticismo pop directo ao corazón, promete unha actuación chea de enerxía e emoción para o público do festival.
O venres 11 de xullo será a quenda de Cascales DJ, un dos grandes nomes da escena electrónica española das últimas décadas. O seu set combinará r'n'b, pop, hip-hop, trap, funk e reguetón, garantindo unha noite de baile e diversidade musical.
O sábado 12 de xullo, Mayo presentará en directo os temas do seu primeiro traballo discográfico, Season I, un disco que conquistou ao público cun pop electrónico intimista e letras pegadizas. A esta xornada de música e diversidade sumarase Sofía Cristo, que ofrecerá unha pinchada entre o "remember" e os sons máis comerciais, sen esquecer os xéneros que a levaron a actuar no aclamado Tomorrowland, como o electro house, beatroom e future house.
O Atlantic Pride, nado en 2019, é un festival pioneiro que combina reivindicación e diversidá cunha proposta musical de primeiro nivel. A súa pasada edición reuniu a máis de 25.000 persoas, e nesta ocasión promete superar expectativas cunha programación pensada para todos os públicos.
Impulsado pola Asociación Orgullo Coruña -ORCO- e o Concello da Coruña, conta co apoio da Deputación da Coruña e o patrocinio de Estrella Galicia, Coruña The Style Outlets e Globalgrafic.
Xunto a estas novas confirmacións, o Atlantic Pride 2025 xa asegurou a presenza de cinco grandes divas do pop español: Judeline, Edurne, Nia, Merche e Paula Koops. Ademais, a nova escena musical galega terá unha forte representación coas actuacións de De Ninghures, Coolnenas, Agoraphobia, Alana, LERIA, ELBA e Rivadulla.
O festival tamén inclúe eventos culturais, como o IV Certame Literario de Literatura LGTBIQ+, organizado polo Club de Lectura QUEERuña, que xa ten aberta a súa convocatoria. Moi pronto anunciaranse novos nomes que completarán un cartel que promete converter A Coruña no epicentro da diversidade, a música e a celebración da liberdade.