Noites do Porto, finalista a Mellor Evento Cultural e Musical nos Premios da Industria Musical de Galicia
Noites do Porto pecha a súa quinta edición cun novo impulso: a súa candidatura como finalista a Mellor Evento Cultural e Musical na primeira edición dos Premios da Industria Musical de Galicia, promovidos pola Asociación Galega de Empresas Musicais (AGEM). A gala de entrega terá lugar o 27 de novembro na Sala Capitol de Santiago de Compostela.
Nacido en 2021 co obxectivo de abrir o Porto da Coruña á cidadanía desde o Peirao de Batería, o festival foi expandindo o mapa e o alcance: de tres xornadas e un único escenario con actuacións como Ángel Stanich, Bad Gyal, Califato 3/4, Derby Motoreta’s Burrito Kachimba e Xoel López, a un modelo que hoxe espalla directos por máis de 16 espazos singulares da cidade ao longo de case 10 días. A aposta pasa por concertos únicos, estreas, lendas e novas voces, disciplinas diversas e unha programación inclusiva que integra o tecido cultural local sen perder identidade.
A promotora agradeceu o apoio institucional ao Concello da Coruña, á Xunta de Galicia e ao Porto da Coruña, así como a fidelidade do público, clave para consolidar un evento accesible, aberto a múltiples públicos e de crecemento sostible.