Nocturnia 2025: 98 actividades para a mocidade coruñesa neste programa de lecer saudable
O programa Nocturnia, destinado á mocidade, arranca a súa edición primavera-verán 2025 con 98 actividades programadas. Esta iniciativa municipal, financiada polo Ministerio de Sanidade a través do Plan Nacional sobre Drogas, ten como obxectivo ofrecer alternativas de lecer saudable á mocidade coruñesa. O programa, que comeza o vindeiro 1 de abril e se prolongará ata agosto, contará cun total de 1.251 prazas para mozos e mozas de entre 12 e 30 anos.
As actividades, de balde, realizaranse en horario nocturno durante as fins de semana. A edición deste ano destaca por propostas tan orixinais como un obradoiro de danza tahitiana, outro de moda sostible con materiais reciclados do mar ou un de xoiería creativa comestible, ademais das tradicionais actividades creativas que caracterizan a proposta.
Este ano, tamén se reforzou a oferta de actividades ao aire libre e de contacto coa natureza. Así, os mozos e mozas poderán disfrutar de rutas ambientais para descubrir espazos naturais de Galicia, como o miradoiro da Terra Chá, Estaca de Bares ou a Costa de Nariga. Tamén se ofrecerá unha xornada de aventura con espeleoloxía e descenso en tirolina na Pontenova. A variedade do programa mantén opcións para todos os gustos, desde obradoiros de fotografía, música, clown e cabaré, ata xogos de rol ou roteiros histórico-culturais dramatizados pola cidade.
A concelleira de Benestar Social, Participación e Igualdade, Nereida Canosa, destacou que "desde o Goberno de Inés Rey apostamos por facilitar alternativas de lecer nocturno saudable e diverso para a mocidade coruñesa". "Nocturnia 2025 amplía e diversifica as propostas para que ningún mozo ou moza quede sen unha alternativa enriquecedora nas tardes e noites de fin de semana", afirmou.
A inscrición ás actividades é totalmente gratuíta e debe realizarse en liña a través da páxina web do programa. As persoas interesadas deberán inscribirse cada semana, desde as 16.00 horas do luns ata as 12.00 horas do xoves ou ata agotar as prazas. Para formalizar a inscrición, será necesario dispor do DNI.