Nace Avibe, a asociación de viñeróns que quere relanzar o viño da Terra de Betanzos
A comarca de Betanzos dá un novo paso na recuperación da súa tradición vitivinícola co nacemento de Avibe, Asociación de Viñeróns de Betanzos (IXP). O colectivo, integrado por máis dunha ducia de persoas apaixonadas pola viña e o viño que veñen demostrando a súa capacidade profesional na campaña 2024/25, pretende fortalecer o sector e dignificar a figura do pequeno produtor, o viñerón, na zona amparada pola Indicación Xeográfica Protexida Viño da Terra de Betanzos.
Avibe convoca xa o seu acto fundacional, que terá lugar o martes 18 de novembro de 2025, ás 17.30 horas, na sede da Fundación Juana de Vega, na rúa Salvador Allende 92, en San Pedro de Nós (Oleiros). Desde o novo colectivo sublíñase a vontade de traballar en rede, compartir coñecemento e reforzar a presenza dos viños betanceiros nos mercados e na hostalaría.
A iniciativa conta coa participación de viticultores de distintos puntos da IXP, incluídos veciños de Paderne como Jorge Molina e Luis Sande, impulsor da adega Pagos de Brigante, un proxecto que nos últimos anos se ten distinguido por apostar pola profesionalización dos viños de Betanzos e pola recuperación de viñedos históricos ao pé do río Mandeo.
A IXP Terra de Betanzos abrangue os concellos de Bergondo, Betanzos, Coirós, Miño e Paderne, así como parroquias de Abegondo, Oza-Cesuras e Sada, dentro da Reserva de Biosfera Mariñas Coruñesas e Terras do Mandeo. Recoñecida como indicación xeográfica en 2000, a zona caracteriza os seus viños pola influencia atlántica, as ladeiras sobre os vales do Mandeo e do Mendo e o protagonismo de variedades autóctonas como o branco lexítimo.
En 2023 contabilizábanse 6 hectáreas en produción, 7 viticultores rexistrados e 6 adegas, cun valor económico estimado arredor dos 33.000 euros, cifras que amosan un sector pequeno pero con grande marxe de crecemento.
Nese contexto, Avibe nace co propósito de ser interlocutora activa nestes debates, impulsando accións de formación técnica, defensa da calidade e posta en valor da identidade propia dos viños betanceiros.
O acto do 18 de novembro está concibido como a posta de longo pública da entidade e como un chamamento a outros viticultores, adegas e administracións da contorna para sumarse a un proxecto que pretende asegurar relevo xeracional, mellorar a rendibilidade das viñas e consolidar a IXP Terra de Betanzos como unha referencia dentro do mapa vitivinícola galego.