Música na rúa dinamizará as noites de verán en Santa Cristina, Santa Cruz e Mera
O Concello de Oleiros pon en marcha este sábado 5 de xullo a nova edición do programa Música na rúa, que levará música en vivo ás terrazas dos locais hostaleiros de Santa Cristina, Santa Cruz e Mera todos os sábados dos meses de xullo e agosto. Esta iniciativa aposta polo lecer, a cultura e a dinamización turística e comercial do municipio, enchendo de ritmo os espazos públicos máis emblemáticos.
Durante o mes de xullo, os concertos celebraranse entre as 20.30 e as 22.30 horas, mentres que en agosto o horario adiantará a comezar ás 20.00 e rematará ás 22.00 horas. En total, están programados 31 concertos que ofrecerán unha ampla variedade de estilos musicais, como jazz, pop, blues, rumba e flamenco, dirixidos a públicos de todas as idades.
O arranque desta temporada virá marcado por catro actuacións simultáneas: en Santa Cruz, na Praza do Castelo, soará o repertorio de Red Planet; en Mera, na Praza do Arxentino, o ritmo será de Calle Rumba; en Santa Cristina, na Praza Afundida, actuará o grupo Máxica; e tamén en Santa Cristina, na zona de La Encina, poderase escoitar a Carlos Miyares.
Con esta iniciativa, Música na rúa consolídase como unha das propostas culturais de referencia do verán en Oleiros, fomentando o aproveitamento dos espazos públicos, apoiando a actividade hostaleira e reforzando a imaxe do municipio como un destino de calidade para gozar dun verán nun ambiente musical acolledor.