Mulleres e mozas enchen o obradoiro de defensa persoal Krav Maga en Arteixo
O salón do CEIP Arteixo acolleu este sábado 29 de novembro de 2025 unha nova edición do obradoiro de defensa persoal Krav Maga dirixido a mulleres e mozas a partir de 12 anos, organizado polo Concello de Arteixo a través do Centro de Información á Muller (CIM). A actividade desenvolveuse en horario de 11.00 a 14.00 horas e contou cunha elevada participación, con praza completa e presenza destacada de rapazas menores de idade.
Na apertura tomaron a palabra o alcalde de Arteixo, José Carlos Calvelo Martínez, o primeiro tenente de alcalde, José María Sánchez Novo, e a segunda tenente de alcalde e concelleira de Igualdade, Servizos Sociais, Sanidade e Educación, Inés Ramos Álvarez. Calvelo subliñou a forte demanda deste tipo de formación, incidiu en que resulta significativo que nenas de 12 anos queiran aprender a defenderse e avanzou que o goberno local estudará convocar dous cursos separados, un para menores e outro para maiores de idade, para aproveitar mellor as sesións. O rexedor agradeceu tamén a colaboración de Gadis, que entregou un detalle ás participantes, e enmarcou a iniciativa nas políticas municipais de igualdade e prevención das violencias machistas.
A formación estivo impartida por Mikel, do club Tip MV Fight Krav Maga Galicia, que combinou explicacións teóricas con exercicios prácticos sobre seguridade persoal e reacción ante situacións de risco. Traballouse especialmente a idea de que o Krav Maga é unha ferramenta de defensa, non un deporte nin un xogo, e que a prevención e a detección temperá de límites son tan importantes como a resposta física ante unha agresión.
Durante a xornada realizáronse dinámicas para activar o instinto de alerta, como carreiras nas que non se debía permitir que ninguén tocase as costas ou desprazamentos polo pavillón evitando chocar co resto, co apoio do equipo técnico que actuou como obstáculo. As asistentes practicaron posicións básicas de seguridade, manter as mans a media altura para reaccionar máis rápido e marcar distancias cando unha persoa xa traspasou certos límites. Tamén se introduciu a defensa fronte a empurróns e golpes básicos e mostráronse nocións iniciais sobre como actuar ante unha estrangulación, lembrando que se dispoñen de poucos segundos para reaccionar.
O instructor explicou que obxectivo do adestramento é preparar ás participantes para eses escenarios, reforzar a súa capacidade de reacción baixo presión e, ao tempo, lembrar que a prevención é esencial: detectar sinais de perigo, establecer límites claros e afastarse, sempre que sexa posible, de situacións nas que a súa integridade poida verse comprometida.
O obradoiro desenvolveuse nun ambiente moi participativo e de apoio mutuo entre as asistentes. Moitas das mozas e mulleres presentes amosaron o seu interese en seguir formándose neste arte de defensa persoal, tanto a través de novos cursos municipais como en clases regulares, polo que o Concello valora xa novas propostas formativas ao fío da boa acollida desta xornada.