Monte Alto gaña novas paradas de bus e taxi para reforzar a conexión co mercado
A contorna do Mercado de Monte Alto conta desde esta semana con novas paradas de bus e taxi, unha intervención coa que o Concello da Coruña busca mellorar a conexión dun dos espazos comerciais de referencia do barrio. A nova parada de autobús da praza de Monte Alto xa está operativa despois de remataren os traballos de sinalización e do pintado final da estrutura, polo que desde a mañá do xoves as persoas usuarias xa puideron empregala con normalidade nos seus desprazamentos diarios.
A posta en funcionamento desta infraestrutura chega poucos meses despois da apertura do novo mercado, inaugurado en decembro do pasado ano tras unha das remodelacións máis ambiciosas acometidas nos últimos anos na cidade. O renovado edificio permitiu dotar á veciñanza dunha praza de abastos máis moderna e cunha oferta comercial máis ampla, ao tempo que contribuíu a revitalizar un dos principais focos de actividade económica e social de Monte Alto.
A alcaldesa, Inés Rey, destacou que a actuación responde a unha demanda pendente no barrio. 'Agora, o proxecto, que supuxo un investimento duns 10 millóns de euros, está acompañado dunhas conexións acordes ao seu tamaño e atractivo. Era unha débeda que existía cun barrio importantísimo para a cidade', sinalou.
A mellora da mobilidade na zona non se limita ao autobús. En paralelo, o Concello habilitou tamén unha nova parada de taxis no número 67 da avenida de Hércules, ampliando así as opcións de desprazamento para a clientela e para as centos de persoas que transitan cada día pola contorna do mercado.
Esta actuación forma parte dunha estratexia máis ampla de renovación da rede de transporte público urbano. Nas últimas semanas, o Concello acometeu a rehabilitación de varias paradas en distintos puntos da cidade, con intervencións na contorna da Torre de Hércules, no barrio dos Mallos, na avenida de Arteixo, no cemiterio de Feáns e tamén na avenida de Fisterra. O obxectivo municipal pasa por modernizar os servizos e favorecer alternativas de mobilidade máis sostibles fronte ao uso do vehículo privado.