Miño repoboa 500.000 ameixas xaponesa para recuperar os bancos marisqueiros do Pedrido
Miño vén de ser escenario dunha nova acción de recuperación ambiental coa solta de 500.000 unidades de ameixa xaponesa nos bancos marisqueiros de Castelo e da Canle do río Mandeo, na zona do Pedrido. A iniciativa, promovida pola Xunta de Galicia e executada coa colaboración da Confraría de Pescadores de Miño, contou coa participación esta mañá da delegada territorial da Xunta na Coruña, Belén do Campo.
A actuación busca reforzar a biodiversidade mariña e garantir a sostibilidade da actividade marisqueira na zona. Para iso, levouse a cabo previamente un traballo de arado do fondo mariño co fin de mellorar o substrato e favorecer o asentamento e desenvolvemento da especie sementada.
A Confraría de Miño recibiu dúas liñas de axuda para facer posible esta intervención: 1.375 euros destinados á preparación do leito mariño e 9.200 euros para a adquisición e posterior sementeira da ameixa xaponesa, procedente de criadeiro.
Durante a visita, Belén do Campo salientou que esta acción “non só persegue aumentar a presenza da especie na zona, senón tamén garantir a viabilidade a longo prazo da actividade marisqueira, mellorar a calidade ambiental dos bancos e fomentar unha xestión responsable baseada en prácticas sostibles”.
A iniciativa insírese nun marco máis amplo de conservación dos hábitats costeiros, tendo en conta criterios ecolóxicos e de infraestrutura azul. Así mesmo, as medidas son definidas en diálogo co sector, recollendo as propostas dos mariscadores para asegurar que a súa aplicación sexa eficaz e beneficiosa.
Con actuacións coma esta, a Xunta reforza o seu compromiso coa recuperación ecolóxica e co apoio ao sector marisqueiro local, clave na economía e identidade de concellos como Miño.