Miño mellora os camiños rurais de A Torre en Bemantes cun investimento de 76.500 euros
O Concello de Miño vén de concluír as obras de acondicionamento dos camiños rurais do lugar de A Torre, na parroquia de Bemantes, cun investimento global de 76.500 euros. A intervención permite mellorar o estado duns viais que presentaban un notable deterioro polo paso do tempo e o uso continuado, favorecendo agora unha circulación máis cómoda e segura tanto para o tráfico rodado como para as persoas viandantes.
Os traballos centraronse na renovación da capa de rodadura e no perfilado e limpeza das cunetas, co obxectivo de garantir un correcto drenaxe das augas pluviais e alongar a vida útil do firme. Como único elemento aínda pendente fica a colocación da nova sinalización horizontal, que se executará nos vindeiros días en función das condicións meteorolóxicas.
O importe total da obra ascende a 67.099,34 euros, dos que 45.818 euros foron achegados pola Axencia Galega de Desenvolvemento Rural a través do Plan Camiña Rural 2025-2026, mentres que o resto é financiado con fondos municipais.
O alcalde de Miño, Manuel Vázquez Faraldo, desprazouse á zona para comprobar o resultado da actuación e puxo en valor a súa repercusión no día a día da veciñanza de Bemantes. 'Con esta obra damos resposta a unha demanda dos usuarios destes camiños. Supón unha mellora dos accesos e aumenta a seguridade da veciñanza. Seguiremos traballando para que todos os nosos núcleos conten con infraestruturas en bo estado', subliñou.
Nesa liña, o rexedor avanzou que, antes de final de ano, o Concello ten previsto acometer traballos de renovación do firme en máis de vinte camiños repartidos por todas as parroquias do municipio, co obxectivo de continuar modernizando e mantendo a rede viaria rural de Miño.
