Miño convértese na capital das letras do 17 ao 20 de xullo con máis dun cento de escritoras e escritores
O Concello de Miño anunciou que entre os días 17 e 20 de xullo a vila acollerá un evento literario que reunirá a máis dun cento de autoras e autores, entre os que destacan premiados nacionais como Chus Pato, Bea Lema e Yolanda Castaño. Tamén participarán outros nomes relevantes como Santiago Díaz, May R. Ayamonte, Luis Zueco, Pedro Feijóo, Arantza Portabales, Silvia Penas, Marta Villar ou Nagore Suárez.
A programación será variada e incluirá “faladoiros e conversas literarias, sinaturas de exemplares, micros abertos e batallas de poetas”, así como un “roteiro poético nunha fraga” e actividades para o público infantil con “narración oral e espectáculos infantís”. Ademais, haberá actuacións humorísticas, discomóbil, karaoke, ilustradores, exposicións e obradoiros.
O Concello destacou tamén a ampla oferta de libros que se poderán adquirir nos puntos de venda participantes, entre eles as editoriais Hércules, Malafera, Mundos Flotantes ou Calacán, e as librarías Pilar, Pedreira e Galgo Azul. Participarán tamén postos da asociación de escritores asturianos Tinta Astur e de ilustradoras ligadas ao colectivo Autobán como Julia Abalde, Cuchiflainas ou Lù Kano.
Con esta iniciativa, Miño aposta por consolidarse como un referente cultural e literario, reunindo a creadores de recoñecido prestixio e achegando a literatura a todas as idades.