Miño abre a inscrición para o curso de monitor/a de tempo libre con prazas limitadas
O Concello de Miño pon en marcha un curso de monitor/a de actividades de tempo libre dirixido a maiores de idade con ESO, graduado escolar ou equivalentes. O título é oficial, emitido pola Xunta de Galicia, e capacita para dinamizar actividades de lecer, recreativas e socioculturais tanto en contornos urbanos como na natureza.
A formación será semipresencial entre o 29 de novembro de 2025 e o 28 de febreiro de 2026, en horario de 9.00 a 14.00 e de 15.30 a 20.30. Inclúe 180 horas teóricas presenciais na Aula de Formación da Casa do Pescador, con saídas prácticas por espazos do municipio e da comarca, 20 horas teóricas a distancia e 150 horas de prácticas. O período de inscrición vai do 15 de outubro ao 15 de novembro, a través da Escola de Tempo Libre Quercus ou do propio Concello de Miño. Haberá un máximo de 25 prazas (mínimo 16 para abrir grupo). O prezo base é de 280 euros, con descontos para persoas empadroadas en Miño, familias numerosas, en situación de desemprego ou con Carné Xove.