Mesa técnica en Arteixo para facer balance do proxecto Londra e marcar os retos pendentes
O Concello de Arteixo celebrou unha mesa de participación técnica para avaliar o estado do proxecto Londra, unha iniciativa de mellora e recuperación do espazo fluvial do municipio que combina intervencións de obra civil e medidas ambientais co obxectivo de coidar o leito dos ríos e a súa contorna.
Na reunión participaron José Manuel Caamaño, concelleiro de Obras, xunto con Alejandro Peña, técnico especialista en obra civil, e José María Ruiz Mora, técnico experto en medio ambiente. Os tres perfís puxeron o foco nos obxectivos do programa, nas actuacións que xa están executadas e nas necesidades a abordar nos vindeiros meses.
No ámbito da obra civil, o proxecto inclúe tarefas como o perfilado de tramos fluviais e a construción dunha nova drenaxe transversal, ademais da eliminación de estorbos e elementos non desexados do leito. En paralelo, as actuacións ambientais pasan por unha limpeza en profundidade e pola recuperación do bosque de ribeira, cunha reforestación activa que contempla a plantación de ata 80 novas árbores.
O proxecto Londra está financiado pola Fundación Biodiversidad (MITECO) con fondos NextGenerationEU.