MercaBetanzos regresa coa Feira de Oportunidades na Praza García Hermanos
Betanzos recupera este fin de semana a súa tradicional Feira de Oportunidades —MercaBetanzos— que se instalará baixo unha carpa na Praza García Hermanos. A actividade, promovida polo Concello como medida para promover e apoiar o comercio local, abrirá as súas portas o sábado 4 de outubro de 11.00 a 21.00 e continuará o domingo 5 de 11.00 a 20.00 horas.
No mercado participarán 18 establecementos do municipio e da contorna, con postos de óptica, téxtil, libraría, estética e alimentación, entre outros. Travesa, ZCV, Beatriz 13, Selgas, Chocolat, Miraquelinda, Distrito Palmeras, Aceitunas La Pastora, Bicos, Confecciones Chela, Dans, El Cantón Ropa Interior, Isi Moda e complementos, Lencería Alicia, Tartaruga, Xoma Kids, Biblos e Acebe ofrecerán produtos con importantes descontos; o Concello cede a cada comerciante un espazo sen custo para facilitar a presenza.
A feira combinará a oferta comercial con actividades de lecer: haberá unha zona de ocio infantil e actuacións de música en directo para crear ambiente e atraer público de todas as idades. A iniciativa conta coa colaboración de Acebe, Chescasco, a Deputación e a Xunta, e a alcaldesa subliñou que a recuperación do MercaBetanzos responde ao éxito de edicións anteriores e á “calidade, variedade e boa imaxe” que caracterizan ao comercio local.