Medio Rural inviste máis de 300.000 euros na renovación da ponte da Maquía para mellorar as comunicacións entre Ordes e Frades
A conselleira do Medio Rural, María José Gómez, visitou hoxe en Ordes as obras de renovación da ponte da Maquía sobre o río Samo, unha intervención que suma algo máis de 317.000 euros co obxectivo de mellorar as comunicacións entre os concellos de Ordes e Frades. No percorrido estivo acompañada pola directora xeral da Axencia Galega de Desenvolvemento Rural, Paz Rodríguez, e pola delegada territorial da Xunta na Coruña, Belén do Campo.
Segundo explicou Gómez, a actuación permitirá un tránsito máis seguro de vehículos agrícolas e contribuirá a evitar asolagamentos nos terreos lindeiros en episodios de enchente. A conselleira enmarcou o investimento 'en favor da poboación do rural', incidindo en que a mellora da mobilidade resulta clave para a saída das producións cara aos mercados.
A titular de Medio Rural salientou que esta intervención se integra no compromiso do Goberno galego coas infraestruturas rurais. Para 2026, os orzamentos da Consellería reservan 4,2 millóns de euros a este capítulo. Ademais, contémplase unha partida de 16,7 millóns de euros para continuar cos procesos de reestruturación parcelaria (ferramentas destinadas a dinamizar o rural e mellorar a competitividade das explotacións) e outros 17,7 millóns de euros para o Plan Camiña Rural, orientado á mellora das vías municipais.
A visita rematou cunha chamada a seguir impulsando proxectos que reforcen a conectividade e a seguridade viaria no rural, 'con feitos, orzamentos e políticas de apoio aos concellos', subliñou a conselleira.