Deportes

Os dous nadadores arteixáns destacaron coa selección española na primeira parada da Copa do Mundo de augas abertas de World Aquatics, en Somabay (Exipto), onde Mateo foi noveno nos 10 quilómetros e bronce no relevo mixto, mentres Paula rematou décimo sétima e como terceira mellor española

O Club Natación Arteixo volveu facerse notar na elite internacional das augas abertas cun papel destacado de Paula Otero e Mateo García na cita de Somabay, a primeira estación da Copa do Mundo 2026. A proba exipcia abriu o circuíto deste ano, que continuará en abril en Ibiza antes de pasar por Italia e Portugal.

No 10K masculino, Mateo García asinou unha actuación de gran peso competitivo ao finalizar noveno nunha carreira gañada polo alemán Florian Wellbrock. A Real Federación Española de Natación destacou que o nadador galego chegou a rodar en postos de cabeza durante varios tramos e pechou a súa participación a só 12 segundos do vencedor, nun resultado que o sitúa entre os nomes propios da delegación española nesta primeira parada.

Na proba feminina, Paula Otero concluíu na décimo sétima posición, por detrás de María de Valdés e Ángela Martínez e por diante de Candela Sánchez, o que a converteu na terceira española mellor clasificada en Somabay. O fin de semana redondeouse coa medalla de bronce de España no relevo mixto 4x1500, unha carreira na que o combinado nacional chegou a liderar a proba durante boa parte do percorrido antes de acabar só por detrás de Alemaña e Hungría. O seguinte escaparate internacional para ambos chegará na segunda parada do circuíto, prevista en Ibiza os días 24 e 25 de abril.