María Pan dimite como alcaldesa de Cambre tras un ano de bloqueo administrativo
A alcaldesa de Cambre, María Pan, anunciou a súa dimisión tras máis dun ano ao fronte da alcaldía e cinco anos como concelleira de goberno. Durante a súa intervención, Pan cualificou a decisión como "a máis difícil da miña vida, pero un paso necesario para que a coalición antinatura de dereitas e esquerdas que intenta dirixir Cambre desde a oposición o faga desde o goberno".
A rexedora denunciou a situación de bloqueo administrativo no Concello debido á chegada de "dúas habilitadas nacionais cun criterio e un xeito de traballar distintos". Ademais, acusou aos concelleiros do PP, PSOE e BNG de Cambre de obstaculizar a xestión municipal e de utilizar os informes das habilitadas como "o seu único discurso político".
Pan lamentou o cambio de actitude dos concelleiros que, segundo afirmou, impediron o pago de facturas a empresas de servizos esenciais ao rexeitar en catro ocasións o recoñecemento extraxudicial de crédito. Tamén sinalou a paralización da modificación da Relación de Postos de Traballo (RPT), o que afecta á organización do persoal municipal.
"Non vou estar aquí dous anos máis cobrando o meu soldo para non ser capaz de pagar a débeda cos provedores, solucionar a falta de persoal do Concello nin seguir mantendo as axudas ao tecido asociativo", manifestou Pan.
Presupostos e RPT: últimas accións antes da renuncia
A alcaldesa avanzou que antes de formalizar a súa dimisión levará a pleno a aprobación do orzamento de 2025, elaborado en colaboración co concelleiro de Economía e Facenda, Daniel Mallo, e consensuado coa oposición. Confía en que os grupos non obstaculicen a súa aprobación. Ademais, anunciou que antes da súa marcha presentará a nova RPT, que conta co apoio sindical pero cun informe desfavorable das habilitadas nacionais e do xefe da área de Urbanismo e Réxime Interior.
"Agora, que farán estes 11 concelleiros que levan meses escudándose nos informes contrarios das habilitadas para botar por terra todas as nosas solucións? Van aprobar a RPT?", preguntouse Pan.
María Pan asumiu a alcaldía o 22 de abril de 2024, trala dimisión do seu predecesor, Óscar García Patiño, quen alegou parálise administrativa tras o cambio de criterio das habilitadas nacionais nos departamentos de Intervención e Secretaría. No seu primeiro mes de mandato, aprobou contratos urxentes para garantir o subministro de combustible a edificios e vehículos municipais e declarou a emerxencia sanitaria pola falta de limpeza nos colexios e no centro de saúde, contratando unha empresa para asumir estes traballos.
O pago de facturas pendentes foi outro dos piares da súa xestión. O Concello abonou 6.708.822,62 euros desde a súa toma de posesión, dos cales 1.170.000 euros foron pagados por decreto de alcaldía baixo a súa responsabilidade directa. En maio de 2024, tras o rexeitamento dos orzamentos municipais por parte de PP, PSOE e BNG, Pan presentou unha cuestión de confianza vinculada ao documento, que quedou aprobado despois de que non se presentase ningunha moción de censura.
Outro dos obxectivos de Pan foi a regularización dos contratos en precario, proceso que iniciaron coa licitación de servizos como a Axuda no Fogar, o mantemento de marquesiñas e o subministro de combustible, ademais de varias obras municipais. Segundo a alcaldesa, este traballo verase reflectido proximamente coa licitación de novos servizos, entre eles o abastecemento de auga, a limpeza de edificios municipais e o mantemento de zonas verdes e xardíns.
A súa dimisión abre agora un novo escenario político en Cambre, onde a oposición deberá decidir se toma as rendas do goberno ou mantén a situación de bloqueo.