Sucesos

A exalcaldesa, que era responsable de Economía e Facenda cando se fixeron os abonos baixo sospeita, compareceu no Xulgado de Instrución número 5 da Coruña nun procedemento que analiza pagos por uns 565.000 euros e que tamén salpica ao seu antecesor, Óscar García Patiño

María Pan compareceu o luns 23 de febreiro como investigada ante o Xulgado de Instrución número 5 da Coruña na causa que analiza o pagamento presuntamente irregular de horas extraordinarias a axentes da Policía Local de Cambre. A exalcaldesa era a responsable municipal de Economía, Facenda e Réxime Interior en 2023, o ano no que se sitúan parte dos abonos baixo sospeita.

O procedemento pon o foco no uso de gratificacións por servizos extraordinarios, un sistema previsto para retribuír traballos fóra da xornada, pero que, segundo a documentación incorporada ao expediente, puido empregarse de forma indebida. A cifra que centra a investigación rolda os 565.000 euros, e as dilixencias non se limitan aos responsables políticos: tamén afectan a outros perfís vinculados ao Concello, incluídos membros do propio corpo.

A clave do caso está en determinar se esas cantidades respondían realmente a 'horas extra' ou se, pola contra, se abonaron gratificacións mentres non se cumpría a xornada ordinaria anual. En acordos e informes municipais recóllese a existencia dun 'incumprimento notorio e xeneralizado' da xornada ordinaria anual (1.751 horas) nos exercicios 2020, 2021, 2022 e 2023, o que levaría a concluír que parte das horas pagadas como extraordinarias poderían corresponder a traballo ordinario. Nese mesmo marco cuantifícase que, entre 2020 e 2023, se abonaron 632.758,09 euros en gratificacións e estimouse un importe 'presuntamente a devolver' de 565.022,45 euros.

En paralelo, o expediente municipal recolle advertencias sobre o encaixe xurídico do sistema de quendas e cadrantes utilizado, con referencias a documentos internos que non terían sido aprobados polo órgano competente e á necesidade de axustar a planificación do servizo aos acordos vixentes sobre xornada e organización do corpo. Esa discusión técnica é unha das pezas que o xulgado deberá valorar para determinar se houbo irregularidades na tramitación, recoñecemento e pagamento das gratificacións.

A investigación xudicial activouse tras unha denuncia do Ministerio Público ao apreciar indicios de posibles delitos como prevaricación e malversación na xestión destes pagamentos. Ademais da vía penal, o asunto tivo derivada no Tribunal de Contas, que abriu dilixencias preliminares para concretar posibles responsabilidades contables, posibles responsables e o alcance económico do dano, unha fronte que o propio Concello abordou en pleno ao pedir a designación de instrutor.