Máis fondos, máis flexibilidade e formación dual para reforzar a empregabilidade dos desempregados
A formación para persoas desempregadas gaña peso na cidade da Coruña cun investimento de preto de 5,2 millóns de euros destinado a impulsar case un cento de cursos AFD, nun contexto no que a Xunta acaba de activar unha nova convocatoria con máis fondos e cun modelo máis flexible, dual e orientado á inserción laboral.
No actual curso 2025-2026, a provincia da Coruña ten xa aprobadas 280 accións formativas por un importe de case 15,1 millóns de euros. Dese conxunto, a cidade concentra preto de 100 cursos e máis de 5,2 millóns de euros, unha cifra que evidencia o peso desta liña dentro das políticas de mellora da cualificación profesional.
A nova convocatoria 2026-2027 conta cun orzamento global de 60 millóns de euros, tras unha ampliación de 20 millóns para este exercicio. Desa contía, preto de 12,6 millóns resérvanse para entidades sen ánimo de lucro. O obxectivo é reforzar a capacitación das persoas sen emprego e responder con maior rapidez ás demandas de talento do tecido empresarial galego.
Entre as principais novidades destaca unha maior flexibilización no acceso á formación. As persoas que rematen unha acción formativa poderán matricularse noutra de nivel superior sen ter que esperar pola expedición do certificado profesional anterior. Esta posibilidade tamén se aplicará a quen estea pendente da homologación dun título estranxeiro.
A oferta abrangue os graos A, B e C do Sistema de Formación Profesional, o que permite desde microformacións ata programas máis completos, adaptados ás necesidades de cada perfil. O novo deseño busca facilitar itinerarios máis modulables e unha incorporación máis áxil ao mercado laboral.
Outra das melloras pasa pola conexión directa coas empresas. Cada acción formativa deberá acreditar unha demanda efectiva mínima do 30 por cento do alumnado, comprometida previamente polas entidades que impartan os cursos. Ademais, os programas de grao C manterán o carácter dual obrigatorio, polo que cando menos o 25 por cento das horas deberán desenvolverse en contornas reais de traballo.
Os cursos están dirixidos preferentemente a persoas desempregadas, aínda que as persoas ocupadas poderán cubrir ata un máximo do 30 por cento das prazas se quedan vacantes. O prazo de solicitude permanecerá aberto ata o 30 de novembro de 2026, co propósito de garantir unha oferta formativa activa durante case todo o ano.
Na Coruña, parte desta programación xa se desenvolve a través de entidades como Cruz Vermella, que conta con apoio para impartir cursos relacionados coa atención sociosanitaria, o transporte sanitario e a atención a múltiples vítimas e catástrofes. A prioridade, en todo caso, sitúase en mellorar a preparación profesional dos alumnos e aumentar as súas opcións reais de atopar emprego.