Máis de 6.000 pemes, microempresas e autónomos solicitan as axudas do PEL 2026 da Deputación da Coruña
O Plan de Emprego Local (PEL) da Deputación da Coruña pechou o prazo da convocatoria de 2026 cun total de 6.050 solicitudes. O período para presentar peticións permaneceu aberto do 15 de novembro ao 16 de decembro ata as 14.00 horas, nunha edición que volve confirmar a elevada demanda deste programa de apoio ao tecido produtivo da provincia.
Desde a institución provincial salientan que a resposta de pemes, microempresas e profesionais autónomos consolida o PEL como unha das principais ferramentas para impulsar o emprego e contribuír á fixación de poboación, especialmente nos concellos máis pequenos. O presidente da Deputación, Valentín González Formoso, definiu o plan como un instrumento que atende 'necesidades reais' e que se converteu nun apoio clave para o desenvolvemento económico do rural coruñés.
A liña con maior volume de solicitudes foi a de PEL-Autónomos/as, que sumou 3.945 peticións. Nesta convocatoria incorporouse como principal novidade a posibilidade de subvencionar o alugueiro de baixos comerciais, naves, oficinas ou centros de traballo, cunha contía entre 200 e 500 euros ao mes e un máximo de 6.000 euros anuais. Mantense tamén a axuda para o pagamento das cotas á Seguridade Social, unha das prestacións máis demandadas. Segundo os datos achegados, 3.055 solicitudes (o 77,4%) corresponden a persoas que non pediran esta axuda en anos anteriores.
Tamén medraron as solicitudes para investimentos no rural. A liña PEL-Emprende Investimento rexistrou 1.445 peticións, destinadas a financiar investimentos en bens inventariables necesarios para a actividade, como maquinaria, mobiliario, equipos informáticos ou aplicacións, co obxectivo de modernizar e mellorar a competitividade das empresas.
No apartado de emprego, as axudas PEL-Pemes vinculadas á creación e mantemento de postos de traballo sumaron 660 solicitudes: 470 na modalidade de creación e ampliación de cadro de persoal (que subvenciona o 60% dos custos das novas contratacións) e 190 na liña de mantemento (que cobre o 50% dos custos salariais do segundo ano de contratos indefinidos realizados ao abeiro da convocatoria anterior).
A Deputación lembra que, entre 2016 e 2025, o PEL mobilizou máis de 127 millóns de euros, co balance de 8.131 empregos creados. O programa inclúe ademais unha Rede Provincial de Coworking con 12 centros distribuídos pola provincia, tres deles especializados en transformación agroalimentaria. Para 2026, a institución provincial prevé manter e reforzar este esforzo para seguir promovendo emprego de calidade e oportunidades no rural.