Máis de 500 persoas sumáronse á benéfica IV Carreira e Andaina polo Párkinson no Burgo
O paseo marítimo do Burgo foi escenario dun gran ambiente coa celebración da IV Carreira e Andaina Solidaria polo Párkinson, unha iniciativa organizada pola Asociación Párkinson Galicia-Coruña coa colaboración do Concello de Culleredo e Castelo Deporte. O obxectivo do evento foi visibilizar a enfermidade e apoiar o labor da entidade.
Máis de 500 persoas sumáronse á cita nas súas dúas modalidades. A carreira contou coa participación de 127 corredores nun circuíto de 10 quilómetros, mentres que a andaina percorreu unha distancia de 4 quilómetros, ofrecendo unha opción máis accesible para todo tipo de participantes.
O alcalde de Culleredo, José Ramón Rioboo, e a primeira tenente de alcalde e concelleira de Deportes, Cristina Pardo, foron os encargados de entregar os premios aos gañadores da carreira. Edgar Mourelle e Inés Fernández proclamáronse vencedores da proba.
O 100 % dos beneficios recadados nesta xornada solidaria destinaranse á Asociación Párkinson Galicia-Coruña, que desenvolve un labor fundamental de apoio ás persoas afectadas por esta enfermidade neurodexenerativa.